Gweithgareddau’r hydref gyda NYLO

Mae’r hydref yn amser i sylwi ar newidiadau yn y byd o’n cwmpas pan fyddwn ni yn yr awyr agored, yn enwedig y lliwiau. Mae’r dail yn troi’n goch, oren a melyn cyn cwympo i’r llawr. Mae’r awyr yn teimlo’n oer, ac rydyn ni’n dechrau chwilio am ein siwmperi clyd…dyma’r amser perffaith i fod yn egnïol a chwarae yn y dail.

Mae tîm NYLO wedi dewis rhai gweithgareddau sy’n addas at yr hydref y gall y teulu cyfan gymryd rhan ynddynt. Gweithgareddau a fydd yn eich annog i wisgo côt, gafael yn eich welis ac ysbrydoli eich rhai bach i fod yn fwy egnïol yn gorfforol yn y dyddiau oerach, byrrach hynny. Byddan nhw’n eich gwahodd i ymchwilio i’r amgylchedd naturiol a dod â’r awyr agored i mewn, gan ddefnyddio cynhwysion cartref sylfaenol yn unig hefyd!

Mae’r gweithgareddau hyn yn ddelfrydol ar gyfer plant rhwng 1-5 oed. Cofiwch beidio â gadael eich plentyn heb oruchwyliaeth tra’n gwneud unrhyw un o’r gweithgareddau hyn.

Coginio

Mae ein myffins blasus yn opsiwn gwych i’w gweini ar ôl prif bryd fel pwdin. Beth am arbrofi trwy ddefnyddio ffrwythau a llysiau eraill sydd dros ben? Mae moron ac oren yn gyfuniad blasus arall.

Myffins Afal a Sinamon

Cynhwysion (yn gwneud 6 myffin mawr/12 myffin canolig)

75g o flawd codi

75g o flawd codi gwenith cyflawn

50g o siwgr mân

1 llwy de lawn o sinamon

75g o afal wedi’i gratio

1 wy, wedi’i guro

75ml o laeth hanner-sgim

75ml o olew llysiau

Offer

Powlen gymysgu, llwy gymysgu, jwg mesur, fforc, clorian, sbatwla, hambwrdd myffins, casys myffin, llwy de, gratiwr.

Dull

1. Cynheswch y ffwrn ymlaen llaw i 190°C/marc nwy 5.
2. Rhowch y casys myffin yn yr hambwrdd myffin.
3. Mewn powlen, cymysgwch y blawd codi, y blawd codi gwenith cyflawn, y sinamon a’r siwgr gyda’r ffrwythau.
4. Mewn jwg, curwch yr wy gyda’r llaeth a’r olew.
5. Arllwyswch y cynhwysion hylif ar y cynhwysion sych a’u cymysgu nes eu bod wedi’u cyfuno.
6. Llenwch bob un o’r casys myffin ¾ llawn.
7. Pobwch am 15-20 munud nes bod y myffins yn frown golau ac yn bownsio yn ôl pan fyddwch yn eu cyffwrdd.

Beth gall y plant ei wneud

Cymysgu

Gratio’r afal

Pwyso cynhwysion

Llenwi’r casys myffin

Sgiliau

Datblygiad iaith, cydgysylltiad rhwng y dwylo a’r llygaid, sgiliau echddygol manwl.

Gweithgaredd

Efallai bod y tymhorau’n newid a’r tymereddau ychydig yn oerach, ond yr hydref yw’r amser delfrydol i gadw’n gorfforol egnïol yn yr awyr agored. Mae osgoi eistedd am gyfnodau hir a chadw’n egnïol yn gwella iechyd a lles cyffredinol plant ac mae gwneud hyn yn yr awyr agored yn dod â manteision enfawr. Yn fyr, nid yw cael plant allan yn yr awyr agored yn ymwneud â llosgi egni’n unig. Mae’n eu helpu i ddatblygu’n gyfannol—yn gorfforol, yn feddyliol ac yn gymdeithasol. Hefyd, mae’n llawer o hwyl!

Her Natur Nansi Nectarin

Beth am roi cynnig ar her natur Nansi Nectarin wrth fynd am dro i gael eich un bach i symud?

Awgrym Da! Peidiwch ag anghofio dod â rhai o’ch darganfyddiadau natur adref gyda chi ar gyfer ein gweithgaredd hambwrdd synhwyraidd dan do.

Hambwrdd synhwyraidd yr hydref

Beth am gyfuno taith gerdded synhwyraidd (crensio dail, gweld a chasglu cnau concyrs/moch coed, sylwi ar liwiau dail) â gweithgaredd hambwrdd synhwyraidd tawel.

Chwiliwch drwy gypyrddau i ddod o hyd i wahanol gynhwysion fel reis a chorbys, cyn mynd allan i ddod o hyd i wahanol wrthrychau natur. Mae hwn yn fwy na gweithgaredd chwarae yn unig; mae’n gyfle i swyno synhwyrau eich plentyn wrth gynnig profiad dysgu cyfoethog. Yna, rhowch y cyfan yn ei le, gwahoddwch nhw i chwarae, a gwyliwch wrth iddyn nhw ymgolli yn hud yr hydref!

Cofiwch, goruchwyliwch blant bob amser wrth chwarae, yn enwedig gyda gwrthrychau bach, er mwyn sicrhau diogelwch. Remember, always supervise children during play, especially with small objects, to ensure safety.

Yr hyn sydd ei angen arnoch:

• Hambwrdd neu gynhwysydd mawr, bas.

• Corbys Oren (i’w defnyddio fel y sylfaen)

• Eitemau a ddarganfuwyd ac a gasglwyd yn ystod taith gerdded synhwyraidd fel moch coed, dail, brigau, mes (gwnewch yn siŵr eu bod yn lân ac yn ddiogel i chwarae gyda hwy).

• Sgwpwyr

• Powlenni Bowls

Stepiau

1. Arllwyswch y corbys i’r hambwrdd i greu’r sylfaen.
2. Rhowch y moch coed, y dail, y mes ac eitemau naturiol eraill a gasglwyd yn ystod eich taith gerdded ar y top.
3. Ychwanegwch sgwpiau a bowlenni i’r ochr neu o fewn y bin.
4. Anogwch eich plentyn i sgwpio, tywallt ac archwilio cynnwys yr hambwrdd!

Sgiliau a Ddatblygwyd

Datblygiad iaith, adnabod siapiau, adnabod lliwiau, cydgysylltiad rhwng y dwylo a’r llygaid, sgiliau echddygol manwl, chwarae dychmygus, creadigrwydd, gwybodaeth a dealltwriaeth o’r byd.

---

Pam chwarae synhwyraidd a chwarae bwyd?

Mae chwarae synhwyraidd yn helpu i hybu dysgu ac yn annog rhai bach i ymgysylltu â’u pum synnwyr, sy’n hanfodol ar gyfer datblygiad cyffredinol.

Yn NYLO rydyn ni wrth ein bodd â chwarae synhwyraidd ar gyfer archwilio gweadau, yn enwedig trwy fwyd. Mae hyn yn cynnig cyfleoedd i ymchwilio i fwyd a chynyddu ei amlygiad. Mae rhai plant yn fwy sensitif i weadau gwahanol. Gall annog chwarae synhwyraidd eu helpu i deimlo’n fwy hyderus wrth roi cynnig ar fwydydd newydd gyda gweadau anghyfarwydd ac o ganlyniad, eu dadsensiteiddio trwy gyffwrdd a sicrhau amser bwyd mwy cadarnhaol.

---

Teclyn bwydo adar wedi’i wneud o foch coed

Mae’r teclynnau bwydo adar cartref hyn yn gyflym ac yn hawdd i’w gwneud, ac yn ffordd wych o roi egni i’ch adar gwyllt lleol yn y cyfnod cyn y gaeaf.

Cofiwch, goruchwyliwch blant bob amser wrth chwarae, yn enwedig gyda gwrthrychau bach, er mwyn sicrhau diogelwch.

Offer

• Moch coed

• Menyn cnau daear (byddai unrhyw fenyn cnau daear llyfn yn gweithio)

• Hadau adar gwyllt

• Plât bach

• Cyllell bwrdd (gallwch ddefnyddio llwy hefyd)

• Llinyn

Stepiau

Casglwch rai moch coed sych a gasglwyd gennych ar eich taith gerdded synhwyraidd.

1. Clymwch ychydig o linyn i ben y moch coed yn barod i’w hongian.
2. Arllwyswch ychydig o hadau adar ar blât.
3. Gyda chyllell bwrdd neu lwy, taenwch y menyn cnau daear ar un o’r
   moch coed.
4. Rholiwch y mochyn coed yn yr hadau adar i’w orchuddio.
5. Ailadroddwch gyda chymaint o foch coed ag y dymunwch.
6. Ewch ati i hongian eich teclynnau bwydo adar yn yr awyr agored a chadwch lygad ar bwy sy’n dod i ymweld!

Sgiliau

Datblygiad iaith, cydgysylltiad rhwng y dwylo a’r llygaid, sgiliau echddygol manwl, gwybodaeth a dealltwriaeth o’r byd.